Ban dawa pynkylla ia ka Sixth Schedule ban pynkhlain ia ki ADC
Shillong, Naitung:U Myntri ka tnad kam pohïing ka Ri u Amit Shah ula khot ban iakren ia ki Chief Executive Member (CEM) jong ki 10 tylli ki Autonomous District Council (ADC) ba don ha ka thain shatei lammihngi ka India.
U CEM ka KHADC u bah Pyniaid Sing Syiem uba la jied ka jingialang kum u nongai khubor ia ka rai ka jingialang mynta ka sngi ha New Delhi, ula pyntip ba ha kane ka jingialang ba long mynta ka sngi, kin leit iakynduh ia u Amit Shah la shai ka sngi ban dawa pynkylla ia ka 125th Amendment ka riti synshar ka ri ban kynthup lang ia ka jingpynkylla ia ka Sixth Schedule.
Ula ong ba la jied ia u bah Pyniaid kum u Convener jong ki 10 tylli ki ADC ba don ha ka North East bad kawei pat ka rai ka long ban dawa ban wanrah noh ia ka jingpynkylla ia ka Sixth Schedule ha kane ka dorbar lyiur jong ka Parliament.
Ki ADC ki don 3 tylli ha Meghalaya, 3 tylli ha Mizoram, 3 tylli ha Assam bad kawei ha Tripura kiba don la ki jong ki jingeh bad ka donkam ban wanrah ia ka jingpynkup bor ban pynkhlain ia ki ADC.
“Ngin pynlong ia ka jingialang baroh ki ADC ha u bnai Nailar ha Shillong”, la ong u bah Pyniaid.
U bah Pyniaid ula ong, ba ka KHADC ka kwah ba ka sorkar India ka dei ban pynkhlain shuh ia ka Sixth Schedule bad ban wanrah ia ki jingpynkylla ia ka Sixth Schedule. U la ong ba ka jingjia ha Bangladesh, ka dei kawei ka nuksa ha kaba ki ADC ki donkam ban don ka bor kaba kham khlain ban iada ia ki trai shnong.
“Ngin ai jingmut ban don 37 ngut ki MDC kynthup ar ngut ban shu sieh bad na kine ki MDC shu sieh, kawei kan dei ia ka kynthei bad kawei ia shynrang”, la ong u bah Pyniaid.
