Mynta ka sngi la pynlong ia ka prokram ban jingpeit bniah ia ka jingpang TB ha Raj Bhavan ia ki ophisar, ki nongtrei bad kiba haiing jong ki khnang ba yn lah ban iada ia ka jingpang TB ha ka por ba dang sdang ryngkat ki lad jingsumar ym tang ia ki riew shimet hynrei na bynta ban iada ia ka imlang sahlang.
Ha kane ka sngi ki don 65 ngut ba wan ban shah sumar bad na kine 9 ngut ki lap ba don jingpang bad 44 ngut la leh ia ka X-ray. Kane ka long ka rynsan ban ïatreilang bad ki paidbah hapoh ka Pradhan Mantri TB Mukt Bharat.
Kum shibynta ka jingpyrshang, ki nongtrei ka Raj Bhavan kin ai jingkyrshan ha ka liang ka bam ia ki 17 ngut ki nongpang TB na East Khasi Hills na bynta hynriew bnai. U Lat ka jylla u CH Vijayashankar hynne ka sngi ula sam ia ka bhah ban kyrshan bam man u bnai sha ki 7 ngut ki nongpang TB kiba dang shah sumar ba la synran lang da kiba ha iing. Ia kiwei pat la aiti sha ka District TB Centre, Shillong ban sam sha ki nongpang kum ka jingkyrshan ia ka imlang sahlang.
Kane ka jingiarap ia ka bam ka long kongsan ia ki nongpang ban ioh ka bor met ba khlain ryngkat ki lad jingsumar ba biang.
