U Myntri Rangbah ka jylla u Conrad K Sangma hynne ka sngi, ula pyntip ba shen un leit sha Delhi ban iakynduh ia u Myntri Kam Pohiing ka Ri u Amit Shah ban kyrpad ban mang pisa khambun na bynta ki kam pynroi ha khappud bad ka ri Bangladesh.
Haba iakren bad ki nongthoh khubor u Myntri Rangbah ula ong, ba yn leit sha Delhi ban iashimbynta ha ka jingialang jong ka GST bad hadien kane yn sa leit ia kynduh ia u Amit Shah ban kyrpad ia ka Sorkar Pdeng ba kan mang pisa kham bun na ka bynta ki kam pynroi ha ha shilynter u pud u sam bad ka Ri Bangladesh khnang ba kan kyntiew ia ka roi ka par bad ia ka ioh ka kot jong ki paidbah kiba sah ha khappud.
U Conrad ula iathuh ba hadien ba kala don ka jingiaumsnam hapoh ka ri Bangladesh, ula ioh ia ka jubab kaba shai kdar na u Amit Shah ba yn ym shah iano iano ruh ban wan rung sha ki khappud kiba don ha ka jylla hynrei ula kubur pat ba kila don kawei ne ar tylli ki jingjia ba kala don ka jingwan rungtuh hynrei la lah pat ban tehlakam ba kiba bun ki briew na Bangladesh kin ioh ban wan rungtuh shapoh ka ri India lyngba ki khappud ka jylla.
Ha kaba iadei bad ka jingbym pat dep ban ker sainar lut ha khappud, u Myntri Rangbah ula ong ba kala don kumba 40 ne 50 Km kaba ympat dep ban ker sainar ha khappud bad ka Bangladesh khamtam ha ki bynta jong ka East Khasi Hills kaba la don ka jingdawa ba deiabn ker sainar na u Zero Line.
