U Myntri Rangbah ka jylla u Conrad Sangma ula iakynduh ia 3 ngut ki nongking lieng ne Kayaker ka jylla kynthup ka Elizabeth Vincent, Batskhem Nongbak bad Pynshngain Kurbah kiba shah jied ban mihkhmat ia ka Ri India ha ki jingiakob ba heh. Ka Elizabeth Vincent na Ri Bhoi ka la shah jied ban iakhun ia ka ICF World Cup ha Prague ka ban long ha u Jylliew, 2024 bad ki nongjop ha kane ka World Cup kin ioh ban iakhun ha ka Paris Summer Olympics 2024. U Myntri Rangbah ula ong, ka jingthmu jong u ban pynlut por bad kine ki nongialehkai bad ban ai khublei halor ka jingshah jied ban mihkhmat ia ka Ri.
“Nga sngew sarong halor ka jinglah jong phi ban lehkai bha tang ha ka por ba khyndiat” la ong u Myntri uba la plie ruh ia katei ka Rafting Project ha ka shnong Umtham ha u Naitung, 2023.U Conrad Sangma ula iakren bad ki nongialehkai, ki Coach bad ki nongialam na ka jylla, ha ka jingiadonlang u Dr. Wilbur Manners, President ka MCA, u Bah Zorba Laloo dkhot ka MCA bad u Coach Ian Vincent.Kitei ki 3 ngut ki nongking lieng ka jylla ki la shah kynthup ha ka kynhun ka Ri India ban shim bynta ha ka International Canoe Slalom Tournament ka ban long ka Ri Russia ha u Nailur, 2024.Ka Elizabeth Vincent, 26 snem ka la ioh rung ban iakhun ha ka World Cup, ka la ioh jinghikai na u Coach uba dei ruh u Kpa jong ka u Ian Vincent hajan ka shnong Umtham bad ka la mihkhmat ia ka Meghalaya ha bun tylli ki rynsan iakob kynthup ia ka National Games, Malabar River Festival bad ka Tawangchu Tides Festival ha Arunachal Pradesh.
Katba u Batskhem Nongbah 18 snem bad u Pynshngain Kurbah 19 snem, ki la wan shim bynta ha ka Khelo India Games 2022. U Batskhem Nongbak na shnong Umtham uba shu trei bylla sngi ula ioh jinghikai na u Ian Vincent bad hynrei u don pat ia ka jingthrang ban kiew shaphrang ha ka kam ialehkai bad ban iakhun ha ki lympung iakob. Kumjuh u Pynshngain Kurbah na Labyrwa ula ioh jinghikai na u Ian Vincent bad ula ioh khur ia ka Takma Rupa ha ka Khelo India Games 2022 bad ula mihkhmat ruh ia ka jylla ha ka Malabar River Festival & Events ha Madhya Pradesh.
