Yn mihkhmat ka Ridamaya ïa ka India ha ka Top Model of Universe ha Turkey

Ka thei bhabriew na ka jylla ka samla Ridamaya Passah kaba na Jowai, ka la shah jied ban mihkhmat ia ka India sha ka Top Model of Universe pageant ka ban long ha Turkey mynta u snem 2024. Kumba shu kdew ka samla Ridamaya ka la ioh ia ka nam kum ka Mega Miss India – Top Model of the Universe ha ka grand ceremony kaba long ha ITA Cultural Complex, Machkhowa, Guwahati myn ha ka 2 tarik Lber.

Ha ka edition ba 20 jong ka Sunsilk Serum Mega Miss Northeast 2024 pageant, ka Dipti Basumatary na Assam, ka Minica Konjengbam na Manipur bad ka samla Ridamaya Passah na Meghalaya ki la ioh khur ia ka jingjop. Ym shym la don ki runners-up title ha ka Sunsilk Serum Mega Miss Northeast 2024 bad kine baroh lai ngut ki la shah jied lang kum ki nongjop ha kane ka jingiakop thei bhabriew bad ioh lang ia kajuh ka song khusnam bad ki jingmyntoi.

Ka samla Ridamaya ka dei kaba na Jowai bad ka dang pule ia ka BA final year ha Women’s College Shillong. Ka samla Ridamaya ka la ioh ruh ia ka nam kum ka nongjop ha ka The Loft Winter Queen pageant kaba long ha U Soso Tham Auditorium, Shillong. Ka Mega Entertainment kala pynkhreh ban ai ia ki jinghikai pyntbit ia baroh laingut ki nongjop, ban pynthikna ba kin tyng shain bha ha ki rynsan jong ka pyrthei.