Ki seng sain pyrthei kynthup ka UDP, BJP mynta ka sngi ki la iakynduh ia ki dkhot ka 16th finance commission ban pynsngew ia ki jingeh ka jylla ha ka roi ka par ka ioh ka kot. Na ka liang ki seng sain pyrthei kin sa pynkhreh da ka jingthoh bad ha ka shi sngi ne ar sngi kin sa phah sha ka Commission. Haba kren sha ki lad pathai khubor u nongialam ka UDP u bah Jemino Mawthoh ula ong ba ka party ka la pynsngew sha ki dkhot ka Commission haba ia dei bad ka roi ka par ka Nongbah Shillong bad kumjuh ki shnong ha khapsor.”Ngi donkam ban ioh ka jingkyrshan na ka sorkar pdeng ban wanrah ka jingkylla ban kyntiew ia ka roi ka par ka ioh ka kot khamtam haba peit ia ka nongbah Shillong, ngi iakynduh jingeh bha halor ka jingkhapngiah nalor kiwei de,” u la ong.
U bah Jemino ula ong ba donkam ban wanrah da kiwei ki lad ki lynti ban weng ia ki jingeh bad donkam ban ioh ka jingiarap bei pisa na ka sorkar pdeng ban don ka roi ka par ha ka jylla. Nalor kane ula pynsngew ruh halor ka pule puthi ha ka jylla Meghalaya kaba la hiar sha trai duh mynta ym kum mynshwa ia ka Shillong la tip kum ka shlem jong ka pule puthi ha kaba ki khynnah samla na kylleng ki jaka bad ki ri ki wan pule ha kane ka jylla. Katba na ka liang u bah David Kharsati ula ong ba ka party ka pynpaw ka jingkhublei ia ka 16 finance commission bad ia ka kynhun baroh kawei.
Hynrei ka party ka la pynpaw ia ka jingsngewkhia halor ka jinglong jingman jong ka jylla bad na ka liang ka commission, ka la bthah ba kin pynkhreh da ka jingthoh ban aiti sha ki. U bah David ula ong ba ka jingsngewkhia eh ka long ba ym dei ban pyndonkam bakla ia ka pisa.”Ngi kwah ba kano kano ka pisa kaba wan na ka sorkar pdeng dei ban pyndonkam hok na bynta ka jingmyntoi u paidbah,” ula ong.
