Yn pynlong ia ka North-East Regatta 2024 ban khring nongshangkai

U Chief Secretary ka jylla u Bah Donald P Wahlang ula plie pyrda iaka 2nd North-East Regatta 2024 hapoh ka Umiam Sailing Club, Orchid Lake Resort, Watersports Complex, Shillong.

Ia kane ka 2nd North-East Regatta la pynlong da ka Umiam Sailing Club (USC), UDAY for Sailors Foundation bad ka Yachting Association of India (YAI) bad ha kane ka sngi plie la iadonlang u Director General of Police ka jylla u Dr L.R. Bishnoi, u Lt. General TSA Narayanan (Retd.), Vice President ka YAI u Bah Robert Lyngdoh, ki Member Secretary ka Umiam Sailing Club bad kiwei kiwei.

U Bah DP Wahlang haba ai jingkren ha ka jingialang, ula pynpaw ia ka jingkmen ba ka Regatta ka la ioh ka jingithuh kum ka National Ranking Event bad ula ai khublei ia ki ophisar jongka Army kiba la synniang ban kyntiew ia kane ka jingialehkai khamtam ha ka jingdon lang jongu Rajesh Chowdhury uba la ioh ia ka khusnam Arjuna Award bad kane kan nang ai mynsiem ia ki samla bad kan kyntiew ia kane ka jingialehkai.

U Bah Wahlang ula iathuh ba ka Sorkar Jylla ka la thaw bun tylli ki Club hapoh ka tnat Jngohkai ym tang na ka bynta ban shongkai pyngnad ne ban pynlong ia ki jait jingiakhun ki bapher hynrei ban pynlong ruh ia ka jylla Meghalaya kum ka jaka jngohkai ba kynsai tam.

Katba u Bah Robert Lyngdoh ula iathuh ba ki don palat shispah ngut na ki 15 tylli ki Club na kylleng ka Ri kiba la pynrung kyrteng ban iakhun ha kane ka Regatta mynta u snem ka ban sdang naduh ka 6 tarik Iaiong bad ki don ia ka jingthmu ban ia leh ban nangkyntiew shuh ia kane ka jingialehkai hapoh ka jylla.