U Myntri ka tnad jngohkai ka jylla u Bah Paul Lyngdoh hynne ka sngi ula pynbna ban pynlong ia ka Cherry Blossom Festival 2024 ha ka 15 bad 16 tarik u Naiwieng 2024 ha Madan Kurkalang, RBDSA Sports Complex Ri Bhoi District ha kaba bun tylli ki kynhun tem bad rwai kin wan ban pynbyrngia ia ki paidbah ha katei ka tamasa. Haba iakren bad ki nongthoh khubor, u Bah Paul Lyngdoh ula ong, ia katei ka tamasa kaba ar sngi yn wan ban sakhi ym tang da ki paidbah na kane ka jylla ne na kylleng jong ka ri India hynrei wat ki briew kiba na kiwei pat ki ri ruh kumjuh.
Ula iathuh ba ia kane ka tamasa mynta ka kynti yn iatreilang bad ka ri Japan bad ka matpdeng jong ka tamasa kadei “Year of Legends”.U Bah Paul ula ong, ba ki don bun ki kynhun tem bad rwai ban wan iashim bynta ha ka Cherry Blossom Festival kiba kynthup ia ka Boney M, ka Kanika Kapoor, Jasleen Royal, ka Queen Sensation na Russiai bad Korn na Slovakia bad kiwei kiwei.
Nalor kane ula ong, ba na ka bynta ki paidbah kiba sngewtynnad ia ka K-Pop, yn sa pynbna kham hadien ia ka kyrteng jong ka kynhun bad wat ia ka kynhun kaba pawnam ka ban dei kaba hakhmat eh ban pynbyrngia yn sa pynbna kham hadien. U Bah Paul ula ong, ba mynta u snem yn iohi ruh ia ka jingwanphai ha ka rynsan tem ia ka kynhun jong kane ka jylla ‘The Great Society’ kata hadien 35 snem. Ula ong, ba ia ki tiket jong ka Cherry Blossom lah ban ioh na ka Book My Show.
