Ka Myntri ka Koit ka Khiah ka jylla ka Kong Ampareen Lyngdoh ka la ong, ka sorkar jylla kan hap ban peit bniah ban pynthymmai noh ia ka polisi treikam halor ka jingiatehkular bad ki samla pule MBBS lyngba ka bhah sorkar, khamtam ba bun kim shym la wanphai sha ka jylla ban ai jingshakri ia ki paidbah hadien ba ki la pyndep ka jingpule jong ki.
Haba iakren bad ki nongthoh khubor, ka Kong Ampareen Lyngdoh ka la ong, “Na ka snem sha ka snem, ka nombor ki Medical Seat ka nangkiew ia ki samla pule ka jylla hynrei ngi dang don ka jingduna doktor ba bun hapoh ka jylla. Kumta ngin sa bishar ban pynthymmai noh ia ka polisi treikam ban pynthikna ba ki doctor ba ioh leit pule na ka bhah ka jylla ki dei ban wan phai biang sha Jylla” ong ka Kong Ampareen.
Ka la bynrap ba ka Tnad ka koit ka khiah ka dang iasyllok bad ka tnad Aiñ ka jylla ban bishar bniah ia katei ka polisi khnang ban pynthikna ba ki samla pule doktor kin wan phai sha ka jylla ban ai ka jingshakri ia ki paidbah ka jylla.
“Ka por ka la iaid la slem bha, ba ki doktor ba pass na ka bhah jong ka jylla, kim shym la wan phai shuh sha ka jylla, kumta ngi hap ban peit ia kane bad ngi kyrmen ngin iohi ia ka jingbun ki nongiakhun ban ioh leit pule MBBS na ka bhah ka jylla, ki dei ban don ka jingkitkhlieh ban wan phai sha jylla ban ai jingshakri” la ong kong Ampareen.
