Namar ka jingkhap ngiah ka surok bah ha Nongpoh ba la wanrah ruh ïa ka jingthut ha ka ïaid ka ïeng jong ki paidbah khamtam ki khynnah skul, ki bor pynïaid kali ka Nongpoh Police Station ha ryngkat ka jingïatreilang bad ki Nongïalam ka Nongpoh Region Auto Owner & Driver Association (NRAODA) lem bad ki Nongïalam shnong ka Nongpoh bad ka Mawroh ki la mih sha surok ban pynbeit ïa ki jaka pynïeng kali kamai bad kali shimet. Ha katei ka jingmih ban pynbeit ïaki rukom pynïeng kali, kitei ki Nongïalam lem bad ki Pulit ophisar na ka tnad police ki la pynlong ïaka jingjurip kaba bniah ha baroh ki jaka pynïeng ki kali kamai bad ki auto kamai kiba la dep ban pynbeit naduh u snem 2017.
Hadien ka jingkhmieh bniah, la pynbeit ba ki auto kamai kiba pynïeng ha baroh arliang jong ka lad ban rung sha Mawroh Nongpoh kin pynjngai 5 Meters naka lad bad kumjuh ki auto bad ki Kali shimet kiba pynïeng baroh arliang ha ka lad ban rung sha ka Dong Sajer, Nongpoh kin pynjngai 5 meter na katei ka lad, katba ki kali Shimet kin ym bit ban leit pynieng haki jaka jong ki kali kamai bad kumjuh ki kali kamai kin ym bit ban leit pynieng ha ki jaka jong ki kali shimet.
Shuh shuh ruh, la pynbeit ban iaid beit ïaid ryntih ki kali bad ban lait naka jingdheng kali khamtam haki jaka long ïew, ka tnad traffic police ka la pynbeit ruh ba kin pyrkhing noh ïaka jingïaid lait lan ki kali ha ki service lane bad kin sdang ban pyntreikam noh ïaka one way bad No Entry ha baroh arliang jong ka Service Lane bad ki la kyrpad ruh ïaki paidbah ba kin bud ryntih ïa kine ki jingpynbeit bad kiba pynkheiñ ia ki kyndon kin ngat ha ki jingshah pynshitom katkum ki kyndon aiñ.
