Ka North Eastern Hill University (NEHU) kan sdang noh ia ka jingai jingpule ia ka Korean Language & Culture naduh ka samoi pule kaban wan kaban sdang ha u Naitung 2025 bad kane kan long ka jingplie lad ia ki samla kiba kwah ban nang ia ka ktien Korea bad yn ai jinghikai ruh ha ki jaka pule ha Korea halor ka ktien Khasi bad Hindi. Dang shen kala don ka jingiasoi ia ka Memorandum of Understanding (MoU) hapdeng ka North Eastern Hill University (NEHU), Shillong bad ka Indo-Korean Business Culture Centre (IKBCC), South Korea ban kyntiew ia ka ktien ka thylliej bad ka kolshor bad ban thaw ia ki lad ki lynti ia ki samla ban iohkam iohjam. Ha kaba u Col. Omkar Singh ula soi ia ka MoU na ka bynta jongka NEHU bad u Dr. Zena Chung, u Founder Director jongka Indo-Korean Business Culture Center (IKBCC).
Ha ka wat kaba nyngkong jong ka jingpyntreikam ia ka MoU, ka NEHU bad ka IKBCC kin iatreilang halor katei ka projek ban pynkhreh ia ka Dictionary kaban kynthup ia ka ktien Khasi-Hindi-Korean-English ha ka por kaba la buh bad hadien kane yn sa sdang ia ka Course ha ka Korean language & culture, kaban sdang naduh ka 25 tarik u Naitung. Nalor kane, yn sdang ruh ia ka prokram halor ka Khasi bad Hindi yn sa sdang ha ki jaka pule ha Korea lygba ka Faculty Exchange Programme bad kan kynthup ia ka jingiatreilang ki jaka pule ban kyntiew bad ban plie lad ia ka jingsam jingtip lang, ban thaw ia ki lad ki lynti ia ki samla pule ban ioh ia ka International Internship, Scholarship bad ka lad iohkam iohjam ha India bad South Korea.
Katkum ka jingiatehkular hapdeng ka NEHU bad IKBCC, ka Prof. Streamlet Dkhar, ka Head jongka Department of Khasi, kan dei ka Academic Coordinator bad ka Dr. Saralin A. Lyngdoh, Head jonga Department of Linguistics, kum ka Course Coordinator na ka bynta ban pyniaid shakhmat ia ki kam bad ia ki prokram na ka bynta ban don ia ka jingiatreilang katkum ka jingiatehkular ha ka jingiatreilang hapdeng kitei ki ar kynhun. U Vice Chancellor ka NEHU u Prof. Shukla, ula ong, ba kane ka jingiatreilang kan pynkhlain ia ka jingiadei hapdeng ka ri India bad Korea bad kan plie lad ia ki samla pule ban tip shaphang ka kolshor jong ka East Asia lyngba ka jingsam jingtip lang ha kaba iadei bad ka kolshor bad ka lad iohkam iohjam.
