Ha kane ka juk stad ka don ka lad ia kito ki shijur ki bym lah ban ioh khun, da kaba pyndonkam da kiwei ki lad ne kaba ki khot ka Invitro fertilization (IVF) centre ne ki test tube baby. Ka Seeds of Innocence kaba na Guwahati ryngkat ka Supercare hospital, Shillong hynne ka sngi ka la plie ia ka IVF centre na bynta ki shijur ki bym lah ban ioh khun namar ba ka kynthei kam lah ban pun ne na ka daw ba u symbai u shynrang um long. Ki bym lah ban pun ki lah ban leit sha ka Seeds of Innocence centre kaba don ha Supercare, Shillong ba kin ioh khun da kaba shu shim ia u symbai jong ki shijur. Haba kren sha ki lad pathai khubor ka Dr Emisaka Sumer ka Consultant Obgy Gynae, ka la ong ba ka jingplie ia kane ka IVF Centre ka long na bynta ban iarap ia ki shijur ki bym lah ban ioh khun. Katkum ka jingiathuh ka Dr Sumer, ki don ki shijur kiba don ka jingshitom ha kaba ki briew kim lah ban pun khun lehse da ki dih dawai ruh kim lah ban pun, hynrei mynta ki don ki lad ba khot ki IVF kaba leh na bynta ki bym lah ban pun khun.
Ka la ong ba mynshwa ki briew haba ki leh ia ka IVF ki hap ban leit shaduh sha Guwahati hynrei mynta da kaba plie ia kane ka Centre ha Shillong kim donkam shuh ban leit shaduh Guwahati tang ban leit Check-up.“Kane ka Centre ka long ban pynduna ia ka jinglut jong ki ha ka leit ka wan,” ka la ong. Hadien ba ki briew ki la ar met bad la seisoh kim donkam shuh ban leit Checkup sha Guwahati hynrei ki lah ban wan checkup ha Shillong, la bynrap ka Dr Sumer. Ka Dr Sumer ka la ong, ba ki IVF Centre ki don ia ka ain bad lada leh IVF ym dei ba shim symbai na kiwei ki briew, hynrei kaba kongsan ka dei na ki shijur. “Hynrei lada ym long u symbai na ka liang shynrang lane liang kynthei, ki don ki bynta ba ki hap ban shim na kiwei (Donors). Hynrei katba dang lah hi ki shim na ki shijur, ki hap ban bud bad shim beit na ki,” ong ka Dr Sumer.
Ka la iathuh ruh ba katkum ka jingsumar jong ki, kiba leh ia ka IVF ki bun bha, iwei na ki shiphew ki don beit ki shijur ki bym lah ban pun hi da lade bad kiba donkam ia ka IVF.Ka la iathuh ba ka daw ba ki briew kim lah ban pun, ka lah ban dei na ka liang kynthei ne na ka liang shynrang, hynrei kum ki doctor ki test beit ban lap ia ka daw khnang ban lah ban sumar. Katkum ka ain jong ka sorkar India, kiba lah ban leh ia kane ka kynthei ka dei ban long ym palat ia ka 45 snem.
