Yn sumar u MLA Jirang ia 36 ngut kiba nongpang TB

u MLA ka Jirang u Bah Sosthenes Sohtun lem bad Ki lai tylli ki Company shimet kiba kynthup ïa ka Shyam Ferrous Century Private Ltd., ka Maythan Alloy Private Ltd. Bad ka Pioneer Carbide Private Ltd. Kiba la tip kum ki Nikshay Mitra ki Nong tyngkhun “Adopt” ïaki Nongpang TB lyngba ka program Pradhan mantri TB Mukt bharat abhiyaan “PMTBMBA” Mynta ka sngi ki la bteng biang ban ai ïaki Jingbam Tei met “Nutritional Food Basket” sha ki 36 ngut ki Nongpang TB kiba dang don hapdeng ka jingsumar.Ïa katei ka program kaba la shim khia daka Ophis District tuberculosis Ophisar, Ribhoi kaba la pynlong mynta ka sngi ha Byrnihat PHC la wan ban sam ïaki Nutritional Food basket da u Bah Sosthenes Sohtun MLA ka jirang,  haka jingiadon lang Ka DM&HO Nongpoh Dr. TS Momin, Dr. E. Kalwing District Tuberculosis Ophisar, Ribhoi District, Dr. P Marak, MO I/C Byrnihat PHC, ki Manager jong ki lai tylli ki Private company kiba tyngkhun iaki Nongpang lem bad ki khynnah pule BSW jong ka Women’s College Shillong. Katei ka program Pradhan Mantri TB Mukt Bharat Abhiyaan (PMTBMBA) kadei ka program kaba la shim khia daka sorkar pdeng kaba la dep ban plie paidbah da ka President jong ka Ri India ka Drupadu Murmu haka 9 tarik Nailar 2022 halor ka thong ban rat diengkhong ïaka jingpang TB ha u snem 2030 bad lyngba kane ka program ka sorkar ka thmu ban pynïoh jingïarap naka bynta kiba pang TB bad ha kajuh kapor ban pynshlur ruh ïa baroh ki nongshnong jong ka Ri India naduh ki nongmihkhmat, ki ophisar, ki kynhun seng trei mon sngewbha bapher bapher, ki riew shimet ba kin phaikhmat ban ïarap sha kito kiba ioh ïa katei ka jingpang ha kaba ïadei bad ki jingbam ki ba tei ïaka met “Nutritional Food Basket”.

Lyngba kane ka program kaba la shimkhia daka Ophis District tuberculosis Ophisar Ribhoi la don haduh 36 ngut ki nongpang TB kiba la ïoh ban pdiang ia ki Food Basket lyngba ka jingnoh synniang daki 3 tylli ki Company shimet bad naka liang u MLA ka jirang u la pynbna ba un dang bteng ban tyngkhun ïa ki 10 ngut ki nongpang dakaba ai ïa u synniang kaba 60 hajar tyngka naka bynta 6 bnai. Na ka liang ka Dr. TS Momin DM&HO Ribhoi ka la pyntip ba haduh mynta ki don haduh 447 ngut kiba ïoh ia kane ka jingpang TB hapoh ka District Ribhoi bad napdeng kitei ki nongpang la don haduh 21 ngut kiba la khlad bad 227 ngut ki dang don hapdeng ka jingsumar. Ka la ïathuh ruh ba kane ka jingpang ka dei ka jingpang kaba lah ban pynkoit dakaba dih tista ïaki dawai bad bam ïaki jingbam kiba tei. Haba kren ha katei ka sngi u Bah Sosthenes Sohtun MLA ka jingrang u la ai ka jing khublei ïaki nongtrei jong la koit ka khiah ba ki la shimkhia ban wat ïaki riew shimet lane ki company shimet ki la wan sha khmat ban ïa snohkti lang ban ïarap dakaba ai ïaki jingbam kiba tei naka bynta ki Nongpang TB, u la ai ruh ka jingkhublei ïaki Lai tylli ki Company kiba la don bynta lang ban ïaleh pyrshah ban pynduh jait ïa kane ka jingpang TB. U la ong ruh kum u nongmih khmat naka thaiñ Ribhoi u don ïaka jingbah khlieh ban ïa snohkti lang bad ka tnad ka koit ka khiah ban rat diengkhong ïa kane ka jingpang.

Ka Sorkar ka don hapdeng ka jingïaleh ban pynduh jait ïa kane ka jingpang dakaba pynmih shibun ki program bad kane ka program Pradhan Mantri TB Mukt Bharat Abhiyaan kadei kawei na ki program ba ka sorkar pdeng ka la wan rah ban pynshlur ïaki Riew shimet lane kino kino ki Company kin wan shakhmat ban noh synniang daki Jingbam kiba tei sha ki nongpang TB khnang ba ki nongpang kin ïoh ïaki jingbam ki ba tei bad kin lah ban ïaleh pyrshah bad kane ka jingpang. U Bah Sosthenes Sohtun ha kane ka sngi u la pynbna ruh ba un nang bteng biang ban kyrshan ïaki Nongpang TB dakaba Ai ïa u Synniang kaba Hynriewphew Hajar tyngka sha ki bor ba dei peit ba kin pynbisng ïaki jingbam kiba tei sha ki 10 ngut ki nongpang naka bynta 6 bnai. Shuh shuh kum u nongmihkhmat paidbah na Jirang u la kyntu ruh ïa kiwei kiwei ki riew shimet lane kino kino kiba lah ban kyrshan ba kin wan shakhmat ban ïa snohkti lang ha kane ka thma ïaleh pyrshah bad ka jingpang TB khnang ngin lah ban rat diengkhong ïa kane ka jingpang. U la kyntu ruh ïa ki Nongpang kiba dang don hapdeng ka jingsumar ba kin tista ban dih ïa u dawai ba la ai daki jaka sumar bad ban pyntikna ruh ba kin bam ïaki jingbam kiba tei.