Ka Meghalaya State Planning Board (MSPB) ha ka jingialam u Chairman, u Bah Metbah Lyngdoh ka la iakren ia ki sienjam ba kongsan ban weng ia ka jingdheng kali ha ka nongbah Shillong. Ha ka jingialang ha ka 4 tarik Risaw, ka MSPB ryngkat ka tnad pynroi sor, Transport bad ka PWD bad kiwei ka iatai sani ban tip ia ki projek bad ki buit treikam ba dang iaid shakhmat ban pynduna ia ki jingeh ha ka leit ka wan.“Kane ka dei ka jingtreikam kaba bteng. Ngi dang lum ia ki jingai jingmut na ki tnad bapher bapher kiba ia dei bad ka jingdheng kali ha ka nongbah Shillong” la ong u Bah Metbah. U la iathuh ka MSPB ka la ïakynduh ïa ka tnad pynroi sor bad Polit bad ka la don ka jingïakren bad ka tnad Transport bad PWD ban sngewthuh ïa ki rukom treikam bad ki Plan ba kine ki tnat ki don ban pyntreikam. Haba kubur ia ki jyrwit jyrwat, u Chairman u la ong, “Kam dei tang ki Pulit ne ka PWD bad ka tnad Transport hynrei kiwei ki tnat ruh ki don ka bynta kaba kongsan. Wat ka tnad PHE ruh ka long kaba kongsan bha, namar kino kino ki jingthmu ban pynheh surok ki lah ban ktah ïa ka jingpynbiang um bad ki marpoh khyndew ki khlaw”. Kumba 23,000 tylli ki kali kiba ïaid man ka sngi na Shillong sha Sohra bad 21,000 tylli na Shillong sha Guwahati, ka jingwan ki kali ka wanrah ïa ki jingeh ba jur ha ki jaka rung bad jaka mih jong ka nongbah. U Bah Metbah u la kdew ia ka jingdonkam ban weng ia ki jingeh ba iadei bad ka jingkyntiew bad pynhiar passenger ki kali kamai, kynthup ia ki taksi. Haba kylli shaphang ki lad ki lynti kiba kyrpang ban tehlakam ïa ka jingkhapngiah kali, u Bah Metbah ula ong, “Kam dei ka jingïalang kaba shisngi ka ban ai ïa ki lad ki lynti kiba kloi. Ka jingpeit bniah ia ka jingpyniaid surok bad ka jingiatreilang hapdeng baroh ki tnad ka long kaba donkam”.
U Bah Metbah ula kdew ka jingduna ki pulit pyniaid kali, ha kaba tang kumba 100 ngut ki ophisar ki pyniaid ia ki surok bad u la ban ba dang donkam bun briew ha kane ka tnat. “Ngi donkam ïa ki pulit ha kiba bun ki jaka” ula ban jur da kaba bynrap ba watla ka jingdon jong ki pulit ka long kaba kongsan, hynrei kam dei ka lad kaba marwei, “Baroh ki nongshim bynta ki dei ban noh synniang mar katjuh ban wad ïa ki lad ki lynti kiba lah ban leh,” u la pynskhem.U Chairman ula kren ruh shaphang ka jinglah ban shna ïa ki lynti ïaid kjat bad ula ong, “Ngi dei ban pyrkhat ïa ka jingdon jaka, ka jingheh jong ka surok, bad kiwei kiwei ki jingduna ha ki jingtei.”Ha kaba iadei bad ka jingbun ki kali kiba iaid mynta ha ki surok, u Bah Metbah u la pyni ba kumba 3,800 tylli ki Local Taxi ki iaid ha Shillong, bad kumba 1,500 haduh 2,000 tylli ki taksi ki iaid ha kano kano ka sngi.U la kubur ba ka jingdon ki kali shimet ha baroh kawei ha ka nongbah ruh ka wanrah ia ka jingeh ha ka leit ka wan.
U Chairman ka MSPB ula pynbna ïa ki jingthmu ban thaw ïa ka kynhun riew shemphang kaba kynthup ïa ki dkhot kiba don ïa ki jingtip ba ïa dei ban thaw ïa ki lad treikam ha ka por ba lyngkot bad ba jrong jong ka jingïaid lynti. “Ngi dang trei stet, hynrei ngin ym pynsted ïa kane ka kam”, bad u la ong ruh ka jingthaw ïa ka kynhun ki riew shemphang ka long kaba kongsan.
