Ka All India Congress Committee kan leh tyngeh katkum ka ain pyrshah ia lai ngut ki MLA ka Congress u Dr Celestine Lyngdoh (Umsning), bah Charles Marngar (Mawhati) bad u Gabriel Wahlang (Nongstoin) kiba la pyniasoh sha ka NPP hynnin ka sngi. “La jied ia ki ha u snem 2023 halor ka jingsngew pyrshah ia ka sorkar, hynrei kumno mynta kin iasoh bad kajuh ka sorkar”, la ong u nongialam ka AICC in-charge ka Meghalaya u A Chellakumar. “Ki MLA kiba la iehnoh ia ngi, ki la thok ia ki nongthep vote”, ula bynrap. Halor ka jingïaid lynti, une u nongïalam ka AICC ula ong ba ka party ka la dep ban sospon ar ngut ki MLA bad ka long beaiñ ïa ki MLA ba la sospon ban pynïasoh sha kawei pat ka party.
“Ngin buddien ïa kane ka kam katkum ka aiñ”, la ong une u nongïalam ka AICC da kaba bynrap ba shen un sa wan sha Shillong. Ka seng ka lah ban ujor da ka mukotduma ha Meghalaya High Court bad lada katei ka hukum kam iahap, ka seng ka lah ban ujor sha ka Supreme Court, la iathuh ka khubor. Shuwa ban shim ia ki sienjam ain, ka Congress kan sa pan jingmut na baroh ki nongialam ka party block bad district ha ka jingialang ka ban long ha ka sngi Palei halor ka jingleh pyrshah ki lai ngut ki MLA kiba mih noh na ka party ha ka sngi Nyngkong.
Katba ka party ka la sospon ia u Marngar bad u Wahlang hynrei ym shym la leh eiei pyrshah ia u MLA ba lai u bah Celestine Lyngdoh. U President ka MPCC u bah Vincent Pala ula ong, ba ka seng kam lah ban leh eiei pyrshah ia u bah Celestine ha ka taiew ba la dep, namar ba ula iadonlang ha ka jingialang ka seng. Hynrei ki tyllong khubor na ka AICC ki la iathuh lada jia ba ka don ka aiñ kan long pyrshah ïa baroh lai ngut ki MLA.
