Ki nonghikai skul hapoh ka shatri jong ka Meghalaya Sarva Shiksha Abhiyan Schools’ Association (MSSASA), ki la ai por ar bnai ia ka sorkar ba kan thungkam pura ia ki babu ne nonghikai SSA. Ia kane ka rai ki nonghikai skul ki la pynbna ha ka jingialang ba long hynne ka sngi ha Madan Malki.Lah ban kdew ba ki nonghikai SSA ki la dawa ba ka sorkar kadei ban pynkiew ruh ia ka tulop ia ka tulop da 100 percent sha ki 12.541 tam ngut eiei ki nonghikai ha kane ka jylla .U President ka MSSASA u Bah Aristotle C Rymbai ula ong ba kin pynbor ia ka sorkar ban thaw ia ka polisi na ka bynta ban ai jingshngain ia ka jingshakri ki nonghikai SSA ha ka jylla Meghalaya kumba la leh ha kiwei pat ki jylla kiba don hapoh ka ri bad da kawei ka rai ki la shim ba kin ai por ia ka sorkar hapoh ka ar taiew ba kadei ban ban pynmih iaka polisi treikam ban thungkam pura noh ia palat 12,541 ki nonghikai SSA.
“Ngi lah ia shim ia ka rai ban jied ne shim tang ia ki 2 tylli ki mat kata ban kyntiew iaka tulop bad iaka jingshngain jong ka jingshakri,”ula ong. Ha kajuh ka por u bah Aristotle u la byrthen ba ka Association kam banse ban shim syndon da ki sienjam ban pynlong da ka jingiakhih kaba tyngeh lada ka sorkar kam shimkhia ia ka jingdawa jongka. Ula ong ba ia katei ka mat la iakren ha ka jingialang kaba la long hynne ka sngi katkum ka rai kaba la shim da ka jingialang jongka General Executive Council (GEC) kaba la long ha ka 21 tarik u Nailur, hadien ba kila ioh ia ki jingtip na ka tnad pule puthi halor ka jingthmu jongka sorkar jylla ban ai ka jingshngain ia ka jingshakri ki nonghikai SSA ha ka jylla.
Ula ong ruh ba na ka liang ki nonghikai ki la ai ruh ban ban phah ia ka rai kaba la shim da ka GEC sha ka sorkar jylla bad kin leit ban iakynduh ia u Myntri Rangbah ka jylla u Conrad K Sangma bad ki Myntri Sorkar ban kyrpad iaki ba kin thaw iaka polisi treikam ha kaba iadei bad ka jingshngain jong ka kam shakri ki nonghikai SSA ha ka jylla Meghalaya.
