Ïakynad ki nongkyrshan ka NPP bad VPP

Ka Kong Ampareen Lyngdoh kaba dei ka kyrtong jong ka NPP ha kane ka Ileksion MP, mynta ka janmiet ka la hap ban pyndonkam da ki kyntien kiba khor bad ban beh ia ki nongkyrshan ia ka party VPP ne u Prah ba kin mih na ka jingialang paidbah jong ka NPP ha Umsning hadien ba ki nongkyrshan ka VPP ki la iai pyrta ia ka sur ha u Prah ha u Prah, tad haduh ba kane ka kyrtong ka la ong, “Phi ki Nongkyrshan u Prah khie leit noh sha la iing namar phi la ioh ia ka lad ban ia lum mynne mynsngi, khie leit noh sha iing ioh mih kano kano ka jingkulmar ne jingmynsaw”.

La sakhi ruh, ba katba ki nongkyrshan ka party NPP ki dang ia sngap bha ia ka jingialap Ilekshon ka Kong Ampareen Lyngdoh ha Umsning hadien ka jingiaid bad ia kynduh briew ha kiba bun tylli ki shnong ha Ri Bhoi District mynta ka sngi, ka la mih syndet syndet ka jingkyrhoi na ki nongkyrshan ka party VPP kiba la pyrta ha u Prah ha u Prah bad ha kane ka khyllipmat ka la don ruh ka jingiajrong kti mar kylliang hapdeng ki nongkyrshan jong ka party NPP pyrshah ia ki nongkyrshan ka party VPP hynrei la lah ban tem noh ia kane ka jingiakynad bad jingiajrong kti da ka jingkloi ban tuklar da ki pulit ka Umsning Police Outpost.

“Phi ki nongkyrshan jong ka party ka bym don nongrim, khie leit noh sha la iing bad peh ia u prah u jong phi katba phi mon”, ong ka kong Ampareen katba ka dang kyrpad ia ki nongkyrshan ka VPP ban mih noh na ka jingialang jong ka NPP. La sakhi ruh, ba ha kane ka jingialang ka party NPP ki nongkyrshan Prah ki la pyrshang ban pynmih ruh wat ia ki jingkulmar da kaba pyrta paidbah ia ka sur ha u Prah tad haduh ba la mih ka jingiakhluit hapdeng ki nongtrei ka party NPP bad VPP, ha kaba tang mar ia dep kren hashwa ban mih noh na ka jingialang ka Kong Ampareen Lyngdoh ka la hap ban ieng ka kali ban pynjaijai ia ka jingiakynad hapdeng ki nongtrei ka party NPP bad ka VPP kiba la sdang wat ban ia jrong kti. La don ruh katto katne kiba la shah kit ha ki pulit ka Umsning Police outpost.