Kan long ka History ia ka Ri Khasi ba ngin ioh ia ka MP kynthei ba nyngkong:Macmillan

Ka National Peope Party, Nongstoin Constituency ka la khot ia ka jongialang jong ki nongialam na ka Block bad kumjuh ruh na ki Primary Unit bapher bapher ban ia pyrkhat bad iatai sani halor ka jingpynkhreh ia ka election sha ka iing dorbar thawaiñ jong ka Ri India ka ban sa long ha ka 19 tarik u Ïaiong 2024. Ha katei ka jingialang kaba la pynlong ha iing sah jong u Bah Macmillan Byrsat, la sakhi ia ka jingwan iashim bynta shitrhem jong ki nongialam ka NPP na ki shnong bapher bapher kiba la shim ruh ia ka rai ban pynkhlain ia ka party bad ban trei shitom na ka bynta ban pynjop ia ka kyrtong MP jong ka Party na Shillong seat ka Dr. Ampareen Lyngdoh.

Nalor ki nongialam na ki primary Unit bapher bapher, la iadonlang ruh u Bah Macmillan Byrsat, President ka NPP Nongstoin Block uba long ruh u MLA barim ka Nongstoin, u Bah L. G Nongsiej, Working President uba long ruh u MDC barim ka Nongstoin, u Bah A. L Syiem, Secretary NPP Nongstoin, u Bah Manoy Byrsat ,Working president, u Bah Albinus Kharbani bad kiwei kiwei ki nongialam ba hakhmat katei ka party.

Haba kren bad ki nongthoh khubor hadien ba la kut ka jingialang, na ka liang u Bah Macmillan Byrsat u la ong ba kan long ka History na ka bynta ka Rikhasi ba ngin ioh ia ka MP kynthei ba nyngkong tam lada ka kong Ampareen kan jop. U la ong ba ka Kong Ampareen ka la long kaba bit bha ban long ka MP, la ka long ha ka kyrdan pule lane ha ka jingshemphang namar i la long I doctorate bad kumjuh i la long ruh i Myntri sorkar bad MLA mynta la bun term. Namarkata u la kyntu ia ki paidbah ba kin iatylli kawei bad ban ai jingkyrshan ia ka kong Ampareen ha kane ka kynti na ka bynta ka jingmyntoi jong ki paidbah.

Ha katei ka sngi la ioh ruh ia ka jingkren na u Bah L. G Nongsiej uba la ban jur ba ka sorkar MDA ka la pass ia ka resolution na ka bynta ban pynrung noh ia ka ktien khasi ha ka khyrnit ba phra jong ka Riti synshar ka Ri hynrei ym shym la don ba kren lem ia kane ha Parliament, kumta ngi donkam ban pynjop ia ka Kong Ampareen ba kan leit ban kren lem ha kaba iadei bad ka jingdonkam jong u paidbah ka Rikhasi Jaintia.