Ki Party ha ka Sorkar Pdeng ki sngewthuh jingmut ban kyrshan ia ki kyrtong ka NDA: Conrad

U Nongialam ba Rangbah jong ka National Peoples Party (NPP) u Conrad K Sangma, u la ong ba ki party kiba donlang ha ka Sorkar Pdeng ki la don ia ka jingsngewthuh jingmut lang na bynta ban ia kyrshan ia ki kyrtong ka NDA ha kylleng ki konstiwensi. Haba kren sha ki lad pathai khubor, u Conrad u la ong ba ka la don ka jingiasngewthuh jingmut kaba skhem hapdeng ki seng kiba iatreilang hapoh ka kynhun National Democratic Alliance (NDA) ban kyrshan ia ki kyrtong ka NDA ha ka elekshon MP Lok Sabha. U la ai nuksa ba u kyrtong ka NDA ha Nagaland u dei na ka seng NDPP, ha jylla Meghalaya dei ka seng NPP, ha Nagaland ka NDPP bad ha ka Outer Manipur ka NPF bad ha Manipur ka BJP.

U Conrad u la ong ba ha ka lah sngi u Blei un leit sha Nagaland na bynta ban leit iakynduh ia u Myntri Rangbah ka Nagaland ban iakren halor katei ka mat.“Nga la iakynduh ruh ia ki nongialam na ka jylla Manipur kiba la wan sha ka nongbah Shillong ban iakren halor ka kam elekshon ban pynthikna ban ai jingkyrshan ia ki kyrtong ka NDA” ong u Nongialam Rangbah ka NPP.

Ula ong, ha ka jylla ba don ka BJP bad ki jaka kiba khlain ka NDPP ne ka don ia ki nongmihkhmat ki jong ki kumta kin kyrshan ia u kyrtong ka NDA.Halor ka jingai jingkyrshan ka BJP ia ki kyrtong ka NPP, u Conrad u la ong, “Man la ki elekshon ngim ju khein sting namar man la ka elekshon ka dei ka elekshon kaba don ia ka jingiakhun, ngi hap ban trei shitom ha Tura bad ngim lah ban khein sting noh”. 

U la ong, ka jingwan ai jingkyrshan jong kino kino ki riewshimet ne kino kino ka seng ka long kaba bha bad kan long ka jingmyntoi ia ka NPP ha kane ka elekshon.