Pdiang ka RBDSA ia ki klob thymmai, iakren ban pynkhreh ia ka Ri Bhoi Day

Shibynta ban ia phylliew jingmut halor ka jingpynkhreh ia ka Ri Bhoi Foundation Day bad ruh ban nang pyntyllun janai ia ki kam jong ka Ri Bhoi District Sport Association (RBDSA) khamtam ka jingnang pynrung ia ki Club thymmai hapoh ka Association, ki nongialam ka RBDSA ki la pynlong ia ka jingialang naduh ka Central Executive Committee bad ka General Council ia kaba la pynlong ha ka ophis treikam ha Nongthymmai, Umsning. Ha kane ka jingiakynduh lang jong ki nongialam ka RBDSA, la wan ban ai mynsiem ruh da u Bah Vincent H Pala, MP ka Lok Sabha, u Bah Charles Marngar, MLA ka Mawhati Konstituensi, u Bah Gabriel Wahlang, MLA ka Nongpoh, u Dr. Celestine Lyngdoh, MLA ka Umsning, nalor ki nongkitkam ka RBDSA ba kynthup ia u Bah RB Shadap, president, u Bah GS Shadap, u Bah Dipshon Ryntathiang nalor kiwei kiwei ki riew rangbah.

Haba pynpaw ia ka nongrim treikam ka RBDSA hadien ka CEC bad ka General Council, u Bah RB Shadap, u la pynpaw, ba kum ka kynhun kaba kdup ia ki kynhun ialehkai bapher bapher mynta ka sngi ki la ioh ban pdiang ruh ia ki kynhun ba thymmai kiba la pyniasoh sha ka RBDSA na ka bynta ki jingpyntyllun ia ki kam ialehkai bapher bapher ha kane ka district Ri Bhoi. U la iathuh ruh, ba nalor ka jingiakren halor ki kam sport, la iatai sani ruh na ka bynta ka jingpynkhreh ia ka jingdap 50 snem ka kynhun RBDSA khamtam ia ka jingrakhe dap 32 snem ka district Ri Bhoi lane ka Ri Bhoi Foundation Day ka ban long ha ka 4 tarik Jylliew 2024 ha kaba kan don ka jingrakhe lyngba ki prokram baroh shitaiew, ha kaba u la bynrap ruh, da kaba ong ba kan don ka jinglut kaba bun kumta ki angnud ba lyngba u MP bad ki MLA kin ioh lem ia ka jingkyrshan ha kane ka jingrakhe.

Haba kren pat ha kane ka sngi, u Ma Vincent H Pala, kum u MP u la pynpaw ia ka jingsngewkmen ban ia donlang bad ka RBDSA ha kane ka sngi ba la pdiang ia ki Club thymmai shapoh ka jylli jong ka da ka jingkyrmen ruh ba ka jingshakri jong ka RBDSA kan nang iai tyngshain na ka bynta ka jingkiew ki kam ialehkai sport bad ki samla donsap ha ki jingialehkai sport bapher bapher. U la pynpaw ruh, ba kum u nongmihkhmat paidbah jong ka Shillong Parliamentary Seat, u la kitbok kitrwiang ia ka RBDSA khamtam ia ka district Ri Bhoi District hi baroh kawei kiba dang pynkhreh ban pdiang ia ka jingrakhe ia ka jingdap 32 snem jong kane ka district, da kaba bynrap ruh, ba un ia tynrong lang ban kyrshan ban pynlong ia ka jingrakhe kaba jop.