Ka working President ka Meghalaya Pradesh Congress Committee (MPCC) ka Deborah Ch Marak, ka la ong ba ki paidbah ki kwah ia ka jingkylla namar ba hadien ba 47 snem ki la jied ia ka longiing u PA Sangma, ki shna tang ia ka PA Sangma stadium. Kane ka nongialam ka Congress ka la ong ba ki paidbah mynta kin kyntait ia ka NPP ka sorkar kaba ialam da u Conrad K Sangma namar ki kam bamsap ha kiba bun ki skhim bapher bapher.
“Dang shen ngi iohi, u Myntri Rangbah u tuh pisa na Meghalaya ban leit ai sha kiwei ki jylla. Kane ka dei kawei na ki daw ba ki paidbah ki kwah ia ka jingkylla,” ong ka Deborah. Ha kajuh ka por, ka Working President ka MPCC ka la kam bad pynpaw ia ka jingsngew skhem ba ha kane ka kynti, u kyrtong ka Congress na Tura, u Saleng A Sangma un rah ia ka nam jingjop ha ka MP. “Watla ngam lah ban batai katno vote ngin jop hynrei ha kane ka kynti, ngi la thikna ba ngin jop ia ka MP na Tura”, ka la bynrap.
Shuh shuh ka Deborah ka la ther ruh ia ka NPP kaba la kynnoh ba ka Congress ka la pyndonkam bakla ia ki nongialam Khristan ban hiar thma ia ka NPP kaba kyrshan ka BJP. “Ki nongialam Balang Khristan bad ki paidbah Khristan ha Rilum Garo kim dei shuh kiba biej hynrei, kila iohi ia kaei kaba la jia ha Manipur, kumjuh ha India,” ka la ong. Ka la ong ba ka Congress ka leit sha ki paidbah ban pan ia ka jingkyrkhu ym ban ialam bakla hynrei ki paidbah ki tip bad ki stad kumno bad iano ban jied.
